ჩემპიონთა ლიგის 2024/25 წლების სეზონი მოახლოვდა, ახალი გათამაშება განახლებული ჯგუფური ეტაპის ფორმატით დაიწყება, პლეიოფი კი უკვე ნაცნობი სისტემით გაგრძელდება. ახალ სეზონში მონაწილეობას 36 გუნდი მიიღებს, პირველ 8 ადგილზე გასული პირდაპირ პლეიოფში გავა, 9-24 ადგილოსნები მერვედფინალის ადგილისთვის ერთმანეთს შეხვდებიან, ხოლო დანარჩენი გუნდები მონაწილეობას გამოეთიშებიან.
OPTA-ს სუპერკომპიუტერმა 1000 სიმულაციის შედეგი შემოგვთავაზა, თუ როგორ განვითარდა მოვლენები, რომელი გუნდი გამოირჩა ყველაზე მეტად და ვინ შეიძლება ჩაითვალოს მთავარ ფავორიტად.
როგორც მოსალოდნელი იყო, ყველაზე მეტი "კომპიუტერული ჩემპიონობა" მანჩესტერ სიტიმ მოიპოვა. პეპ გუარდიოლას გუნდს ჩემპიონთა ლიგის მოგების 25.3%-იანი შანსი მიეცა, რაც ყველაზე მაღალია. 39.9%-ია იმის ალბათობა, რომ სიტი მინიმუმ ფინალში გავა.
მეორე ფავორიტი ტურნირის ყველაზე მეტჯერ მომგები რეალია, რომელსაც კილიან მბაპე დაემატა. კარლო ანჩელოტის გუნდის ჩემპიონობის ალბათობა 18.2%-ია, ხოლო ფინალში გასვლის - 31.6%.
მესამე პოზიციაზე კიდევ ერთი განსხვავებული ჩემპიონატის წარმომადგენელია - ინტერი. "ნერაძურიმ" ფინალში ცოტა ხნის წინ, 2023 წელს ითამაშა. 21.2%-ია იმის შანსი, რომ ინტერი ფინალში ისევ გავა, ჩემპიონობის ალბათობა კი 10.9%-ით განისაზღვა.
ჩემპიონობის 10%-ზე მეტი შანსი მხოლოდ ამ სამ გუნდს აქვს, მათ შემდგომ მთავარ ფავორიტებად კი ახალგაზრდა ესპანელი სპეციალისტების გუნდები, არსენალი (6.3%) და ბაიერ ლევერკუზენი (5.4%) მოიაზრებიან.
სიაში მათ შემდეგ მოდის უკვე ბარსელონა (5.2%), ლივერპული (4.2%), ბაიერნი (4.1%) და პსჟ (4.1%), ხოლო ათეულის ბოლო წევრი ლაიფციგია (2.4%).
ჩემპიონთა ლიგის ახალ სეზონში 3 ქართველს ვიხილავთ საქმეში. ოთარ კიტეიშვილს შტურმს 10.4%-იანი შანსი აქვს, რომ მერვედფინალში გავიდეს, შემდეგ ეტაპებზე მათი ხილვის ალბათობა კი უკვე ძალიან მცირეა.
ირაკლი აზაროვის შახტარს ჯგუფიდან გასვლის 3.9%-იანი ალბაობა აქვს, ხოლო გურამ კაშიასა და სლოვანს - 1.2%. სლოვაკური გუნდი ჯგუფური ეტაპის მთავარ აუტსაიდერად მიიჩნევა.
Opta-ს სუპერკომპიუტერმა გამოთვალა ისიც, თუ ვის აქვს ყველაზე რთული კალენდარი. მეტოქე გუნდების ყველაზე მაღალი საშუალო რეიტინგი პსჟ-ს ერგო (92.4), რომელსაც ლივერპული (91.8) და პრაღის სპარტა (91.7) მოჰყვებიან. ყველაზე "იღბლიანი" გუნდები სელტიკი (87.4), ბაიერნი (87.7) და დორტმუნდი (88.3) აღმოჩნდნენ.
დებიუტანტებიდან ყველაზე ოპტიმისტურად ჟირონას შანსები ფასდება, მათი პლეიოფში ხილვის ალბათობა 48.8%-ია, ხოლო ჩემპიონობის - 1%.
