2024-25 წლების UEFA ჩემპიონთა ლიგის ნახევარფინალური ეტაპის პირველ მატჩში ბარსელონა საშინაო კედლებში ინტერს უმასპინძლებს.
გთავაზობთ 6 მთავარ ფაქტორს, რამაც შეიძლება გადამწყვეტი როლი ითამაშოს ამ ორმატჩიან დაპირისპირებაში:
1. ინტერს შეუძლია ბარსელონას მაღალი ხაზის გამოყენება
ჰანსი ფლიკის ხელმძღვანელობით, ბარსელონა ძალიან მაღალი დაცვის ხაზით თამაშობს და მეტოქის თამაშგარეში ჩატოვებას ცდილობს. მიმდინარე სეზონში მათ უკვე 267-ჯერ ჩატოვეს ოპონენტი თამაშგარეში, რაც თითქმის ორჯერ მეტია, ვიდრე სხვა რომელიმე გუნდის შედეგი.
მიუხედავად იმისა, რომ ინტერი თამაშგარეში ყველაზე ხშირად ჩარჩენილი გუნდია (119-ჯერ), მათი მოქნილი 3-5-2 ტაქტიკა და შეტევის სტილი ეფექტურად იყენებს დაცვაში გაჩენილ სივრცეებს. ბარსელონას ეს ტაქტიკა ზოგჯერ წარმატებულად მუშაობს (მაგალითად, დორტმუნდის წინააღმდეგ), თუმცა ბოლო კვირებში გუნდი გადაღლილობის ნიშნებს ავლენს და კონცენტრაციის დაკარგვის ტენდენცია შეინიშნება.
2. ინტერის ფორმის ვარდნა
ბაიერნთან მოპოვებული დრამატული გამარჯვების (ჯამში 4:3) შემდეგ, ინტერი ცუდ ფორმაშია. ზედიზედ სამი მარცხი მილანთან (0:3), ბოლონიასთან (0:1) და რომასთან (0:1), სამივე მატჩში უგოლოდ.
ამ შეხვედრებში ინტერს საგრძნობლად გაუჭირდა რეალური საგოლე მომენტების შექმნა. სტატისტიკურადაც, თითოეულ მათგანში მეტოქეზე ნაკლები საგოლე შანსი ჰქონდათ, რაც შეტევაში არსებულ სირთულეებზე მიუთითებს.
3. ლევანდოვსკის არყოფნა - პრობლემა თუ შესაძლებლობა?
რობერტ ლევანდოვსკი, რომელიც მიმდინარე სეზონში 40 გოლით ბარსელონას საუკეთესო ბომბარდირია, ტრავმის გამო, სავარაუდოდ, ორივე მატჩს გამოტოვებს. მისი არყოფნის პერიოდში გუნდმა ხუთივე მატჩი მოიგო და ჯამში 19 გოლი გაიტანა.
მისი პოზიცია ფერან ტორესმა დაიკავა და უკვე 6 გოლის გატანა მოასწრო. ესპანელი უფრო მობილურია, მეტ სივრცეს ქმნის და შეტევაში დინამიურად ერთვება. გარდა ამისა, სხვებს უკეთესად უქმნის საგოლე შანსებს, ვიდრე ამას ლევანდოვსკი აკეთებს.
4. ინტერს ფლანგებიდან შეუძლია ბარსელონას დაზიანება
ინტერის შეტევის მთავარი ძალა ფლანგებზე გადის, განსაკუთრებით გამოსარჩევია ფედერიკო დიმარკო. იტალიელი მარცხენა ფლანგზე ძალიან აქტიურად თამაშობს და ჩემპიონთა ლიგაშე საშუალოდ 2.2 საგოლე შანსს ქმნის.
მარჯვენა ფლანგზე კი, დიდი ალბათობით, დენზელ დუმფრისი დაბრუნდება ძირითად შემადგენლობაში. ის ტრავმის შემდეგ ფორმას იღდგენს და შეტევაში უფრო აგრესიულია, ვიდრე მატეო დარმიანი. ამავე ფლანგიდან დორტმუნდმაც შეძლო ბარსელონასთვის პრობლემების შექმნა, რაც შესაძლოა ინტერმაც სცადოს.
5. რაფინიას გამორჩეული სეზონი
რაფინია გამორჩეულ სეზონს ატარებს. მას უკვე 51 გოლში აქვს მონაწილეობა მიღებული (გოლი + ასისტი), რაც ევროპაში მეორე საუკეთესო მაჩვენებელია მოჰამედ სალაჰის (56) შემდეგ. თუმცა პენალტების გამოკლებით, ამ სტატისტიკას რაფინია ლიდერობს.
ბრაზილიელს ჩემპიონთა ლიგაზე უკვე 12 გოლი აქვს გატანილი და მხოლოდ ერთი საგოლე ქმედება აშორებს იმ ნიშნულამდე, რაც აქამდე მხოლოდ კრიშტიანუ რონალდუსა და რობერტ ლევანდოვსკის ჰქონდათ დაფიქსირებული - მონაწილეობა 20 გოლში ერთ სეზონში.
6. პედრი V. ბარელა - ნახევარდაცვის ბრძოლა
პედრი და ნიკოლო ბარელა თავიანთი გუნდების ნახევარდაცვის მთავარ მამოძრავებელ ძალას წარმოადგენენ. პედრის ბარსელონაში უკვე 80 საგოლე შანსი აქვს შექმნილი და მხოლოდ რაფინიას ჩამორჩება.
ბარელა ნაკლებ პასს ასრულებს, თუმცა მაღალი ეფექტურობით. მან 26-ჯერ გაჭრა მეტოქე გუნდის დაცვის ხაზი და გუნდს ბევრს აძლევს როგორც შეტევაში, ასევე დაცვაში.
შეჯამება
ბარსელონა საკუთარ მოედანზე ფავორიტად ითვლება, თუმცა ინტერს გააჩნია ყველა საჭირო იარაღი, განსაკუთრებით ფლანგებზე და მაღალი დაცვის ხაზის წინააღმდეგ, რათა სერიოზული წინააღმდეგობა გაუწიოს კატალონიურ გრანდს.
ლევანდოვსკის არყოფნის მიუხედავად, "ბლაუგრანაში" შეტევაში მაინც სახიფათოა ფერან ტორესისა და რაფინიას ფორმის წყალობით, ლამინე იამალზე საუბარი კი ზედმეტია, თინეიჯერი შემტევი ყველა მატჩში გასაოცარია.
ცენტრალურ ზონაში პედრისა და ბარელას დაპირისპირებამ კი შესაძლოა მთლიანი დაპირისპირების ბედი განსაზღვროს. ჩვენი პროგნოზი ამ მატჩიდან შეგიძლიათ იხილოთ საიტზე - ბმული.
მომზადებულია OPTA-ს მიერ.
