ლიონელ მესისა და კრიშტიანუ რონალდუს ეპოქამ ჩაიარა, ფეხბურთში ახალი ერა დაიწყო და ოქროს ბურთის გამარჯვებულის გამოვლენა კიდევ უფრო რთული მისია გახდა.
გასულ წელს ოქროს ბურთს როდრი დაეუფლა, თუმცა მიმდინარე სეზონი მან ფაქტობრივად სრულად გამოტოვა მძიმე ტრავმის გამო, ამიტომაც ამ ჯილდოს ახალი მფლობელი ეყოლება.
მთავარი ფავორიტი მოჰამედ სალაჰი იყო, თუმცა ჩემპიონთა ლიგიდან ნაადრევად გამოვარდნის გამო მისი შანსები მკვეთრად შემცირდა. შემდეგ, სიის სათავეში რაფინიაც მოექცა, მაგრამ ბრაზილიელის შედეგიანობამ იკლო და მასზეც ნაკლებს საუბრობენ.
რომელიმე ფეხბურთელს სხვებზე აშკარად უკეთესი სეზონი არ ჰქონია, რის გამოც ოქროს ბურთისთვის რბოლა ისევ ღიაა, მაგრამ, მთავარ ფავორიტად უკვე იკვეთება ის, ვინც ჩემპიონთა ლიგას მოიგებს.
ფინალში ერთმანეთს პსჟ და ინტერი შეხვდებიან, კანდიდატები კი ორივე მხარეს ჰყავს.
ინტერიდან ლაუტარო მარტინესი უნდა გამოვარჩიოთ. არგენტინელს უკეთესი სეზონებიც ჰქონია, მაგრამ ოქროს ბურთის გამარჯვებულის გამოვლენისას ხშირად ითვალისწინებენ ფეხბურთელის სტაბილურობას და გასულ სეზონებს, ამიტომ ლაუტარო ნამდვილად არის პრეტენდენტებს შორის.
პსჟ-ს მხრიდან პირველ რიგში უსმან დემბელე უნდა ვახსენოთ, რომელიც ფენომენალურ სეზონს ატარებს. ფრანგ შემტევს 46 მატჩში 33 გოლი და 13 ასისტი აქვს, რაც ნამდვილად ბრწყინვალე შედეგია.
ჩემპიონთა ლიგაზე ჩატარებული გამორჩეული მატჩების გამო ჯანლუიჯი დონარუმას ვარიანტიც გამოჩნდა. იტალიელი მეკარე პსჟ-ის წარმატების ერთ-ერთი მთავარი მიზეზია და შეიძლება ითქვას, რომ პლეიოფში ის გუნდის საუკეთესო ფეხბურთელიც არის.
ბევრს არ საუბრობენ, თუმცა ჩვენი კანდიდატის წარდგენაც შეგვიძლია - ხვიჩა კვარაცხელია. რატომ არა? მიზეზები გვაქვს.
ორი შიდა ჩემპიონატი
ხვიჩამ პსჟ-სთან ერთად ლიგა 1 მარტივად მოიგო, მაგრამ არ უნდა დავივიწყოთ, რომ ის შესაძლოა სერია A-ს ჩემპიონიც გახდეს. ნაპოლი ცხრილში პირველ პოზიციას იკავებს და ინტერს 3 ქულით უსწრებს, ამიტომ თავის თავზეა დამოკიდებული.
კვარამ სეზონის პირველი ნახევარი სწორედ იტალიაში გაატარა და 17 მატჩის ჩატარებაც მოასწრო, თავი კი 5 გოლითა და 3 საგოლე გადაცემით გამოიჩინა. თუ ნაპოლი საქმეს ბოლომდე მიიყვანს, ხვიჩა ერთდროულად იქნება იტალიისა და საფრანგეთის ჩემპიონი, რაც ბევრს ნამდვილად არ გაუკეთებია.
სადებიუტო ჩემპიონთა ლიგა პარიზში
როგორც უკვე ვახსენეთ, ოქროს ბურთის მფლობელის ვინაობა ალბათ ჩემპიონთა ლიგის ფინალში გაირკვევა. პარიზელებს ისტორიაში პირველად შეუძლიათ ტიტულის მოგება, რაშიც კვარას წვლილი ძალიან დიდი იქნება.
ქართველი ვარსკვლავი ლუის ენრიკეს სისტემის ერთ-ერთი უცვლელი წევრია და სწორედ ამიტომ, მან ჩემპიონთა ლიგის პლეიოფის ყველა მატჩი ძირითად შემადგენლობაში დაიწყო და თითქმის სრულად ჩაატარა.
ლივერპულთან, ასტონ ვილასთან თუ არსენალთან კვარა მინდორზე გამორჩეული ფიგურა იყო როგორც შეტევაში, ასევე დაცვითი ფუნქციების შესრულების დროს. ასტონ ვილასთან მან ულამაზესი გოლიც გაიტანა, ემირეიტებზე კი უსმან დემბელეს არსენალთან გამარჯვების გოლი გაატანინა.
შუა სეზონის ეფექტი
ზამთრის სატრანსფერო ფანჯარაზე ახალ კლუბში გადასვლა ყოველთვის რთულია, მითუმეტეს, როცა შენს სანაცვლოდ 70 მილიონ ევროს იხდიან და მოლოდინები დიდია. ხვიჩამ ეს არ შეიმჩნია და პირველივე დღიდან ეფექტურია.
კვარაცხელიას რამდენიმე კვირა დასჭირდა იმისთვის, რომ გუნდის ერთ-ერთი ლიდერი და ძირითადი შემადგენლობის უცვლელი წევრი გამხდარიყო, რაც მარტივი მისია არ გახლდათ, რადგან პარიზელთა ყველა შემტევი ბრწყინვალე ფორმაშია.
ეს აუცილებლად გასათვალისწინებელი ფაქტორია, ქართველის ტრანსფერს ეფექტი უმალ ჰქონდა და პარიზელთა სათამაშო ხარისხზე მყისიერად აისახა.
ბოლო სანაკრებო ტურნირი
მართალია გასულ წელს, თუმცა მაინც, ბოლო სანაკრებო ტურნირი ევრო 2024 იყო, სადაც საქართველომ ევროპისგან დიდი პატივისცემა დაიმსახურა. გადამწყვეტ მატჩში საქართველომ პორტუგალია დაამარცხა, სადაც ანგარიში სწორედ კვარაცხელიამ გახსნა.
ხვიჩა ეროვნულ ნაკრებს ლიდერობდა და ტურნირის ერთ-ერთი გამორჩეული ფეხბურთელი იყო. მითუმეტეს, თუ ოქროს ბურთის სხვა კანდიდატების გამოსვლას შევადარებთ ბოლო სანაკრებო ტურნირებზე, კვარა, ამ მხრივ, უკონკურენტოდ საუკეთესოა.
ყველაფერი წინ არის
ალბათ, ხვიჩას ოქროს ბურთის მოგება გაუჭირდება და ამის ერთ-ერთი მიზეზი მისი სტატისტიკაა. მას პსჟ-ის მაისურით 21 მატჩში 9 საგოლე ქმედება აქვს, რაც ცუდი შედეგი არ არის, თუმცა სხვებთან შედარებით მშრალი მაჩვენებელია.
მაგრამ, ჩემპიონთა ლიგის ფინალი წინ არის და ვინ იცის, იქ კვარაცხელიამ ისეთი პერფორმანსი აჩვენოს, რომ მსოფლიოს აზრი შეაცვლევინოს.
