ჯერ კიდევ ოთხი წლის წინ არსენალს ხვიჩა კვარაცხელიას შეძენა შეეძლო, თუმცა, როგორც კლუბის ყოფილი სკაუტი ამბობს, კლუბმა ამ შესაძლებლობაზე უარი თქვა.
ტომაშ პაშიეჩნის ყვება, რომ ჯერ კიდევ რუბინის შემადგენლობაში მყოფი კვარაცხელია პოლონეთში გასამართ ტურნირზე ნახა საქართველოს ახალგაზრდულ ნაკრებში.
როგორც აღმოჩნდა, ტომაშს არამხოლოდ კვარაცხელია, არამედ ზურიკო დავითაშვილიც ძალიან მოეწონა, მიუხედავად იმისა, რომ მას სხვა ფეხბურთელებზე დავკვირვება ევალებოდა.
"საქართველოს ახალგაზრდული გუნდი პოლონეთს ესტუმრა, სადაც საკვალიფიკაციო ტურნირი იმართებოდა.
სხვა ფეხბურთელებს უნდა დავკვირვებოდი, თუმცა, როდესაც ხვიჩა და ზურიკო დავითაშვილი ვნახე, სხვა სკაუტებთან და კლუბთან მათზე საუბარი დავიწყე.
ორივე ფეხბურთელი ვიცოდით რუსეთიდან და მათ პროგრესს თვალს ვადევნებდით, სადაც ხვიჩას ერთი პრობლემა შევატყვეთ.
რუბინის და დინამო მოსკოვის მატჩზე ვიყავით. ხვიჩა სკამიდან შემოვიდა, 2 დრიბლინგი გაუცუდდა, რაზეც მაყურებლებს უარყოფითი რეაქცია ჰქონდათ.
ის ამას ვერ გაუმკლავდა, მისი შემდეგი მცდელობები უფრო და უფრო ცუდი ხდებოდა. ბურთს მარტივად კარგავდა და ბრაზდებოდა, მან რწმენა დაკარგა.
ყველამ იცოდა, რომ ის ძალიან ნიჭიერი ფეხბურთელი იყო, თუმცა უნდა გაგვერკვია, შეძლებდა თუ არა ამ პრობლემის გადალახვას.
არავის ეპარებოდა ეჭვი, რომ ის კარგი ფეხბურთელი გახდებოდა. იმ მომენტში მომიწია მისი დახასიათება ისე, როგორც ვნახე", - ამბობს პაშიეჩნი The Sun-თან.
საბოლოოდ, არსენალმა კვარაცხელიას შეძენა მისი მენტალიტეტის გამო აღარ მოისურვა.
სულ რამდენიმე დღის წინ ლონდონური კლუბი ჩემპიონთა ლიგიდან პსჟ-მ გამოაგდო, რომლის ერთ-ერთი ლიდერიც სწორედ ქართველი ვარსკვლავია.
