გერმანული ფეხბურთი დაბრუნდა და როგორც ბოლო პერიოდში მივეჩვიეთ, ბუნდესლიგაში ისევ გოლების სიმრავლეა. ევროპის წამყვან ლიგებს შორის მატჩში საშუალოდ გატანილი გოლების რაოდენობით ბუნდესლიგა მეორე პოზიციას იკავებს.
ბუნდესლიგაში სტატისტიკა ყველაზე მეტად ლევერკუზენისა და შტუტგარტის მატჩებში მოძლიერდა. გერმანიის მოქმედი ჩემპიონის ორივე მატჩში 5-5 გოლი გავიდა, ხოლო შტუტგარტის ბოლო შეხვედრა ჯერჯერობით მიმდინარე სეზონში ყველაზე შედეგიანი იყო და 3-3 დასრულდა.
ამ ორი გუნდის მატჩებში საშუალოდ 5.0 გოლი გადის, შემდეგ კი ცხრილში ჰოფენჰაიმი (4.5) და მაინცი (4.0) მოდიან.
ჰაიდენჰაიმმა ყველაზე მეტი გოლი გაიტანა ისე, რომ ჯერ ბურთი არ გაუშვია. ბადენ-ვიურტემბერგერებმა პირველ ტურში ზანკტ პაულს 0-2 მოუგეს, შემდეგ კი აუგსბურგი 4-0 დაამარცხეს.
ყველაზე ნაკლებად შედეგიანი, რაც არ უნდა მოულოდნელი იყოს, დორტმუნდის მატჩებია. ნური შაჰინის გაწვრთნილი გუნდის 2 მატჩში მხოლოდ 2 გოლი გავიდა, თანაც ორივე პირველ მატჩში. დორტმუნდმა სიგნალ იდუნა პარკზე ფრანკფურტს 2-0 მოუგო, მაგრამ გოლები 72-ე და 93-ე წუთებზე გაიტანა, ხოლო შემდეგ ვერდერთან უგოლო ფრე ითამაშა.
უმაღლეს ლიგაში დაბრუნებული ზანკტ პაული და ბოხუმი არიან გუნდები, რომლებსაც ჯერ გოლი არ გაუტანიათ, საკუთარ კარში კი ორივემ 3 ბურთი მიიღო.
მაინცის, ჰოფენჰაიმის, ლევერკუზენისა და შტუტგარტის მატჩებში ორივე გუნდმა შეძლო გოლების გატანა, ჯერჯერობით მათ საკუთარი კარის დაცვა უჭირთ. საპირისპიროდ, ერთადერთი მატჩი, სადაც გოლი საერთდ არ გავიდა, ვერდერსა და დორტმუნდს შორის შედგა.
თუ მოსალოდნელი გოლების (xG) სტატისტიკას დავეყრდნობით, ყველაზე მეტი გოლი ლევერკუზენს უნდა გაეტანა, თუმცა ჩაბი ალონსოს გუნდის ანგარიშზე მოსალოდნელზე 1.66-ით ნაკლები ბურთია. ამ დროისთვის, ყველაზე "იღბლიანი" გუნდი ჰაიდენჰაიმია, რადგან მათ მოსალოდნელზე 1.74-ით მეტი გოლის გატანა მოახერხეს.
პრობლემებია ბაიერნის თავსაც, თუმცა ვინსენტ კომპანის მაღალი დონის ფეხბურთელები ეხმარებიან. რეკორდმაისტერმა მოსალოდნელ გოლებს 1.2-ით აჯობა და საკუთარ კარშიც იმაზე 1.05-ით ნაკლები ბურთი გაუშვა, ვიდრე უნდა მიეღო.
კონსრასტული სიტუაციაა ლევერკუზენში, როგორც უკვე აღვნიშნეთ, მოქმედმა ჩემპიონები მოსალოდნელ გოლებს 1.66-ით ჩამორჩებიან, ხოლო საკუთარ კარში 1.98-ით მეტი ბურთი მიიღეს. შეიძლება ითქვას, რომ ალონსოს გუნდს არ უმართლებს, ან უბრალოდ მომენტების რეალიზაციის პრობლემაა.
ბუნდესლიგის გასულ სეზონში მატჩში საშუალოდ 3.22 გოლი გადიოდა და წელს გერმანელები ამ მაჩვენებელს მცირედით ჩამორჩებიან (3.11), თუმცა მოსალოდნელია, რომ სეზონის მსვლელობასთან ერთად ეს სტატისტიკა გაუმჯობესდება.
ბოლოს, ასე გამოიყურება ბუნდესლიგის ტოპ 10 გუნდი, რომელთა მატჩებშიც პირველი 2 ტურის შემდეგ ყველაზე მეტი გოლი იყო მოსალოდნელი.
