როცა მთელი მსოფლიო ილია თოფურიას და ისლამ მახაჩევის ბრძოლის მოლოდინში იყო, ამ უკანასკნელმა წონა შეიცვალა.
ილიამ თავისი ქამარი ვაკანტური გახადა და მსუბუქ წონაში გადავიდა, სადაც მას სწორედ დაღესტანელ მებრძოლთან სურდა დაპირისპირება.
ეს არ გამოვიდა, რადგან ბელალ მუჰამედმა, რომელიც მახაჩევის მეგობარია, ქვესაშუალო წონის ქამარი ჯეკ დელა მადალენასთან დათმო, ისლამი კი სწორედ მას შეხვდება.
საბოლოოდ, თოფურიას ჩარლზ ოლივეირასთან უწევს ქამრისთვის ბრძოლა, მაგრამ, როგორც ჩანს, ქართველი ზედა წონაში გადასვლასაც განიხილავს.
"თუ ფანებს სურთ, რომ ერთ დღეს ქვესაშუალო წონაშიც ვიბრძოლო, რატომაც არა?
მინდა, რომ ხალხს სიამოვნება მივანიჭო. თუ საინტერესო ბრძოლის ჩატარების შანსი მომეცემა, უარს არ ვიტყვი.
მთავარია, მეორე მხარესაც სურდეს ბრძოლის ჩატარება და მიზეზების ძიების ნაცვლად, სიტყვა შეასრულოს", - თქვა ილიამ.
ასე რომ, მახაჩევს თუ თოფურიასთან დაპირისპირება არ სურს, კიდევ ერთხელ მოუწევს წონის შეცვლა.
