ბაქოში ჩატარებული UFC-ს ღონისძიების შემდეგ ორგანიზაციის პრეზიდენტმა, დანა უაითმა განაცხადა, რომ მძიმე წონის ჩემპიონმა, ჯონ ჯონსმა სპორტული კარიერა დაასრულა და დივიზიონის ჩემპიონის ტიტული ტომ ასპინალს გადაეცა.
„ჯონსმა დაგვირეკა და გვაცნობა, რომ კარიერა დაასრულა. ტომ ასპინალი UFC-ს მძიმე წონის ჩემპიონია“, – განაცხადა უაითმა პრესკონფერენციისას.
37 წლის ჯონსი შერეული ორთაბრძოლების ისტორიაში ერთ-ერთ საუკეთესო სპორტსმენად ითვლება. მან კარიერის მანძილზე 30 ბრძოლა ჩაატარა, საიდანაც 28 მოიგო. ერთი ორთაბრძოლა გაუუქმდა, ხოლო ერთხელ არალეგალური ილეთის გამოყენების გამო დისკვალიფიკაცია გამოუცხადეს.
ჯონ ჯონსი UFC-ს ქვემძიმე წონის ჩემპიონი წლების განმავლობაში იყო, ხოლო კარიერის ბოლოს მძიმე წონის ჩემპიონის ტიტული მოიპოვა. მან UFC-ში 16 სატიტულო ბრძოლა მოიგო და ორგანიზაციის ისტორიაში ყველაზე ახალგაზრდა ჩემპიონია, მან ქამარი პირველად 23 წლის ასაკში მოიპოვა.
ჯონ ჯონსმა თავიდან ბევრი ფული მოითხოვა... მოლაპარაკებების შემდეგ UFC-მ მის მოთხოვნებზე დაითანხმა და ჯონსმა განაცხადა, რომ ბრძოლისთვის მზად იყო. თუმცა, რამდენიმე დღეში თქვა, რომ მაინც აღარ გამოვიდოდა - ამის შესახებ დანა უაითმა განაცხადა.
