ეროვნული ლიგის სეზონი დასასრულს უახლოვდება, თუმცა საჩემპიონო რბოლაში ჯერ გადაწყვეტილი არაფერია და 3 გუნდი ტიტულის მოპოვების დიდ შანსს ინარჩუნებს. იბერია 1999, ტორპედო და დილა პირველობას უმიზნებენ.
31-ე ტურისთვის ცხრილის სათავეში სწორედ იბერიაა, თბილისურ გუნდს 64 ქულა აქვს და უახლოეს მდევარს ქუთაისის ტორპედოს 3 ქულით უსწრებს. გორის დილა 59 ქულით მესამე პოზიციას იკავებს. ეს ტური სამივე გუნდისთვის განსაკუთრებით მნიშვნელოვანია, რადგან იბერია და დილა ერთმანეთს ხვდებიან, ხოლო ტორპედო მეოთხე ადგილოსან დინამო ბათუმს მასპინძლობს.
სეზონი საინტერესოდ ვითარდება, ჩვენ კი შეგვიძლია სტატისტიკურ მონაცემებს გადავავლოთ თვალი და ვნახოთ, რომელი გუნდები გამოირჩნენ 2024 წელს.
თუ განხილვას შეტევით დავიწყებთ, მაშინ აუცილებლად მოგვიწევს იბერიაზე საუბარი, რადგან ლევან კორღალიძის გუნდი ამ კომპონენტში ნამდვილად გამორჩეულია, რასაც ციფრები ადასტურებს.
— ყველაზე მეტი გატანილი გოლი (66)
— ყველაზე მაღალი მოსალოდნელი გოლების რაოდენობა (63.55)
— ყველაზე მეტი დარტყმა საშუალოდ (16.5)
— ყველაზე მეტი კუთხური საშუალოდ (5.6)
მიმდინარე სეზონში, იბერიას ყველა მატჩში გავიდა მინიმუმ 1 გოლი, ხოლო თავად იბერიამ 31 მატჩიდან მხოლოდ 3 შემთხვევაში ვერ შეძლო გოლის გატანა. იბერიას მატჩებში საშუალოდ 3.45 გოლი გადის, რაც ყველაზე მაღალი მაჩვენებელია.
ეროვნული ლიგის ფეხბურთელებს შორის ყველაზე მაღალი საშუალო შეფასება სწორედ იბერიელებს აქვთ. Sofascore-ზე უმაღლესი რეიტინგი გიზი მამაგეიშვილმა დაიმსახურა (7.57), რომელსაც თანაგუნდელი გიორგი კოხრეიძე (7.54) მოსდევს, მესამე კი დილას მოთამაშე აბუბაქარ კონტეა (7.38).
შემდეგი გუნდი, რომელზეც ვისაუბრებთ, სწორედ გორის დილაა. თუ იბერია გამორჩეულია შეტევაში, დილა ქულების დაგროვებას კარგი დაცვის ხარჯზე ახერხებს. გორელებს ეროვნული ლიგის სეზონში ყველაზე ცოტა, 25 გოლი აქვთ გაშვებული. მათთან ყველაზე ახლოს ტორპედოა, რომელსაც 10-ით მეტი გოლი აქვს მიღებული საკუთარ კარში.
დილამ 12 მატჩში შეძლო კარის მშრალად შენახვა, რაც საუკეთესო შედეგია. აღსანიშნავია, რომ მოსალოდნელი გაშვებული გოლების სტატისტიკაშიც გორელები არიან გამორჩეულები - 35.96.
ეროვნული ლიგის ყველაზე უხეში გუნდი, მოულოდნელად, დინამო თბილისია. გაახალგაზრდავებული დინამო მატჩში საშუალოდ 15.3-ჯერ ჯარიმდება და 2.5 ყვითელ ბარათსაც იღებს. დინამოელები ორივე ამ სტატისტიკურ მონაცემში პირველ ადგილზე არიან.
ყველაზე მეტი წითელი ბარათი ფოთის კოლხეთმა მიიღო - 7. მეორე პოზიციაზე 4 წითელი ბარათით დინამო ბათუმია, შემდეგ კი 3-3 ბარათებით იბერია და გორის დილა.
საშინაო კედლებში ტორპედოს ვერავინ შეედრება. ქუთათურება 15 მატჩიდან 12 მოიგეს და მხოლოდ 2-ჯერ დამარცხდნენ, ჯამში კი 37 ქულა მოაგროვეს. საპირისპიროდ, გასვლით მატჩებში ყველაზე დამაჯერებელი იბერიაა - 16 მატჩი, 12 გამარჯვება, 36 ქულა.
თუ რეიტინგით მამაგეიშვილი საუკეთესოა, სტატისტიკურად ბიორნ იონსენი და ტაირელ ვაუტერი ლიდერობენ. იონსენი პირველია მიმდინარე სეზონში, ვინც 20-გოლიან ნიშნულს მიაღწია. ტორპედოს ნორვეგიელი ფორვარდი ვაუტერს 3 ბურთით უსწრებს. სამაგიეროდ, ვაუტერს 4 საგოლე გადაცემაც აქვს, რის ხარჯზეც დილას ახალგაზრდა შემტევი გოლი+ასისტი კომპონენტის ლიდერია.
დავით კერესელიძე ოქროს ხელთათმანის მოგების გამოკვეთილი ფავორიტია. დილას მეკარემ 12 მატჩში შეინახა კარი მშრალად. მეორე პოზიციაზე მყოფ ფილიპ კლიაკიჩს 8 მშრალი მატჩი აქვს და სეზონის დარჩენილ ნაწილში გაუჭირდება კერესელიძის შედეგის ჯობნა.
სტატია მომზადებულია 8 ნოემბრის სათამაშო დღის სტატისტიკამდე.
